EMISIONI VETTING
Ilaçet e skaduara, “dënimi shtesë” i të burgosurve
Prokuroria e Posaçme (SPAK) ka nisur hetimet pas raportit të Kontrollit të Lartë të Shtetit që konstatoi se në depot farmaceutike në burgje ka medikamente të skaduara dhe se tenderat e zhvilluar nga Drejtoria e Burgjeve. SPAK ka nisur verifikimet për të identifikuar shkeljet dhe përgjegjësitë penale të personave që kanë bërë shkelje dhe të drejtuesve.
Hetimet e SPAK-ut vijnë pas publikimit të raportit të KLSH-së ku ishin konstatuar problematika serioze në Drejtorinë e Burgjeve. Audituesit kanë konstatuar se depoja farmaceutike e burgjeve është jo vetëm jashtë standardeve, por janë gjetur edhe medikamente të skaduara që u serviren të burgosurve. Madje, në raportin e KLSH-së thuhet se në magazinën e burgjeve është edhe një medikament i rrezikshëm, kancerogjen, që rrezikon jetët e tyre.
“Gjithashtu, nga kontrolli fizik i kryer në magazinën e medikamenteve, u konstatuan medikamente të skaduara që në vitin 2019, por që në inventarizimin e bërë në fund të po këtij vit, nuk rezultojnë të jenë identifikuar dhe deklaruar si të skaduara dhe për pasojë të përfshiheshin në listën e medikamenteve të propozuara për t’u nxjerrë jashtë përdorimi, duke fryrë fiktivisht gjendjen e medikamenteve të mundshme për përdorim”, thuhet në raportin e KLSH.
Nga ana tjetër, Kontrolli i Lartë i Shtetit ka konstatuar se 13 lloj medikamentesh janë marrë në dorëzim nga Drejtoria e Burgjeve me afat skandence më të ulët se sa specifikimet e tenderit. “Nga shqyrtimi i medikamenteve të skaduara në vitin 2019 dhe 2020 në depon farmaceutike të DPB-së, konstatohet se 4 medikamente për vitin 2019 (2 lloje Buscolamine, Prulan, Tetalgam) dhe 9 medikamente për vitin 2020 (Acid folic, Adrenaline, Buscolamine,
Durilak, Nacl 0.9%, Haloperidol, Ranitidine, 2 lloje Luminal) janë marrë në dorëzim në kundërshtim me kushtet e kontratës, me afat skadence më të vogël se 1.5 vite dhe si rrjedhojë e këtij fakti kanë skaduar në depon farmaceutike të DPB-së”, thuhet në raport.
Po ashtu nga Kontrolli i Latë i Shtetit u konstatua një situatë kaotike në lidhje me emërimet në administratën e burgjeve, ku me gjithë përpjekjet, nuk është arritur që të plotësohen 220 vende vakante.
